Hermann: Búnir að stimpla smá trú í liðið aftur

Hermann Hreiðarsson leikmaður íslenska landsliðsins á von á erfiðum leik þegar liðið mætir því skoska á Laugardalsvellinum í kvöld.

Íslendingar gerðu jafntefli við Norðmenn í Osló og á sama tíma töpuðu Skotar fyrir Makedóníu.

,,Við sváfum bara vel á laugardagskvöldið og svo er bara að einbeita sér að næsta verkefni. Þetta stig telur ekkert nema að við gerum eitthvað á morgun (Í dag).
Ólafur Jóhannesson og leikmenn liðsins voru sáttir með eitt stig í Noregi, hvað verða menn sáttir með í dag?

,,Við spiluðum vel í Noregi og sýndum gríðarlegan karakter, ef við gerum það á morgun og spilum vel og sýnu hvað í okkur býr þá verðum við ánægðir, Þetta snýst allt um úrslit ég veit allt um það en fótboltinn er bara þannig að þú getur spilað illa og unnið leik sem við yrðum sáttir með en fyrst og fremst viljum við sýna hvað í okkur býr. Við viljum fá þrjú stig en það gerist ekki nema að við spilum vel."

Sjálfstraustið hefur ekki verið mikið hjá íslenska liðinu undanfarið en ljóst að eftir jafnteflið gegn Norðmönnum þá er það á uppleið.

,,Sjálfstraust er gríðarlega mikilvægt í fótbolta og það getur gert gæfumuninn. Við þurfum að trúa hvern á annan og trúa því að við getum unnið öll þessi lið. Við erum búnir að stimpla smá trú í liðið aftur með þessum úrslitum, það er engin spurning að þetta á eftir að gera okkur gott."

Skoska liðið er vel mannað og var nálægt því að komast inná á Evrópumótið í sumar en eftir að George Burley tók við liðinu hefur það ekki enn unnið leik.

,,Ég á von hörkuleik og veit að þeir munu koma dýrvitlausir. Þeir eru með hörkulið og eru með betra lið en Norðmenn ef eitthvað er á pappírunum. Við verðum að spila gríðarlega vel til að eiga einhvern séns á að taka þetta,"