Góð aðsókn á Landsbankadeild karla í sumar

- Næstbesta aðsókn frá upphafi

Flestir mættu á heimaleiki KR í sumar.

Góð aðsókn var á leiki í Landsbankadeild karla í sumar og mættu að meðaltali 1.106 áhorfendur á hvern leik í Landsbankadeildinni. Þetta er næstbesta aðsókn frá upphafi en 1.329 áhorfendur mættu á leikina árið 2007 sem er aðsóknarmet.

Í ár var í fyrsta skiptið leikið með 12 lið í efstu deild og fjölgaði leikjunum í deildinni því úr 90 í 132. Alls voru það 145.958 áhorfendur sem mættu á leiki sumarsins.

Flestir áhorfendur mættu á heimaleiki KR árið 2008 eða 1.931 að meðaltali. Með næstbestu aðsóknina að meðaltali voru Keflvíkingar en 1.616 áhorfendur mættu á heimaleiki þeirra.. Á heimaleiki Íslandsmeistara FH mættu svo 1.256 áhorfendur að meðaltali.

KR var einnig með bestu meðalaðsóknina á útileiki sína en mjótt var þar á mununum. Að meðaltali mættu 1.285 áhorfendur á útileiki hjá KR, 1.275 mættu að meðaltali á útileiki á Valsmönnum og 1.259 áhorfendur að meðaltali á útileiki FH.

Best sótti leikurinn var leikur Keflavíkur og Fram í 22. umferðinni en 3.875 áhorfendur mættu á þann leik. Næstflestir mættu á leik KR og Vals í 11. umferðinni en 3.158 mættu á leikinn.

Flestir mættu á leiki 4. umferðar en þá mættu 9.849 áhorfendur á leikina sex sem gera 1.642 að meðaltali á leik. Fæstir áhorfendur mættu á leiki 20. umferðar en þá mættu 3.922 á leikina sem gerir 654 áhorfendur að meðaltali á leik.

Athugasemdir

[Atli Freyr Sveinsson, 1.10.2008 kl. 09:41]

Það er frábært að sjá þessa frétta. hvað það eru margir sem koma og horfa á íslenskan fótbolta.